Su logu
Crabas est una bidda de giai 9000 abitantis, chi s'agatat in sa zona nord-ovest de sa pianura de su Campidanu a 9m a sus de su livellu de su mari, cun unu spatziu de 120 chilometrus cuadraus. Su tempus est callenti-umidu cun pagu precipitatzionis.
In su logu de Crabas ddui funtis meda zonas de paui de intaressu naturalisticu e culturali importantis meda, comenti su staniu de Crabas, mannu prus de 20kmq (e chi est duncas unu de is prus mannus de s'Europa) innui acostau a is ribas s'agatat su centru abitau, is stanius de Mistras e Mar'e Pontis e is stanius de Mar'e Pauli e Pauli'e Sali. Custu est stetiu nominau area proteta de su WWF, gratzias a sa presentza de su Pollo Sultano, una specie acanta de sparessi. Importanti atrativa turistica de totus custus stanius est cussa chi innoi a Crabas tzerriant sa genti arrubia (fenicottero rosa), chi si poit castiai de is passerellas costruias amposta a longu de is ribas de su staniu de Crabas.
Sa penisua de su Sinis est una zona collinari a vocatzioni prus de ogna atra cosa agricola, chi tenit su privilegiu, comenti giai nau, de cunservai situs de intaressu naturalisticu, comenti cuddu de Seu, atra area proteta de su WWF, innui a pati sa mata mediterranea si point bii meda specias faunisticas, comenti su sriboni, su lepiri, su tostoniu e s'arritzoni de mata.
Crabas nascit a sus de una zona costiera: meda chilometrus de spiagias inghiriant sa bidda, giai totas caraterizadas de s'anea cuartzifera de caori biancu manna comenti de s'arrosu; de su Comuni de Crabas faint pati puru s'Isua de Maluentu (chi tenit una spiagia cuartzifera) e sa punta de Cabu S. Mracu.
In totu sa zona costiera de Crabas, de su 1997 triballat s'Area Marina Protetta "Penisola del Sinis - Isola di Mal di Ventre".
A pati is zonas de intaressu naturalisticu, a Crabas si point visitai puru meda situs archeologicus, comenti Tharros; Cuccuru Is Arrius, tanti po ndi nai unu, necropoli neolitica chi s'agatat in mesu a su staniu de Crabas; sa cresia de Santu Srabadoi, a suta de innui s'agatat su Tempiu paganu de Marti e Veneri (300 a pustis de Cristu circa), innui de su tempus de is nuragicus fintzas a sa fini de su mundu antigu fiat paraticau su cultu paganu de s'acua sorgiva, acoa scambiau cun su cultu cristianu po Santu Srabadoi, praticau a s'initziu a intru de su tempiu e acoa in sa cresia costruia a sus; sa cresia de Santu'Anni; e po una fini digna de su tour archeologicu non si ndi podeus scaresci nimancu de su museu e de is prus de binticincu nuraghis presentis in su logu nostu.