Sìndigu

Efisiu Trincas

Efisiu Trincas (o Efisceddu, commenti issu attottu cherit essi tzerriàu), est nasciu in Crabas su tres de Mratzu de su ’cinquantaquattru. Laureau dattori, de s’ottantaquattru tribàllada commenti e dentista. Coiàu e babbu de duus fìllus, Trincas est appassionau de politica giài de candu fiat picioccheddu. In su ’settantasetti s’est postu in mesu cun su Partidu Sardu d’Atzioni; de pagu, a Nadài de su Duamilla e ses, est stettiu fintzas nominau Segretariu Natzionali de su partidu. De su ’norantacincu fintzas a su duamilla est stettiu Contzilléri de sa Provincia de Aristanis cun s’Amministratzioni Sanna. Ellégiu Sìndigu de Crabas po sa prima ’otta a Cabudanni de su ’norantottu cun prus de su corantaduus po centu de is votus, Efisiu Trincas immoni est arribbàu a metàdi de su segundu mandau, gratzias a su sosténniu giau de is Crabarìssus me in is elletzionis de su duamilla e tresi, chi ddu aint confermau Sìndigu cun tremilla e sescentucorantatresi votus, contru a is milli e sescentusottantatrèsi pigàus de sa lista guidàda de Annàtziu Carrus e is ottucentutrintùnu de Pasquai Castangia. De candu est Sìndigu, Efisiu Trincas adi emìttiu ordinantzas, chi meda ’ottas aint fattu nãi sa genti, commenti is divietus postus in su Sinnis de arragolli gingellas e de fumai a intru de is localis de Crabas (custu giai unu annu primu chi sa lèi natzionali féssit approvada); atras ordinantzas ddu aint fìntzas fattu nominai de is giorronalis continentalis e internatzionalis (bastat pentzai a su divietu de fumai postu me in is ispiaggias de su Sinnis, cun unu artìculu chi est bessìu in s’editzioni tedesca de su giorronali scientificu "Focus"). Su nòmini suu est arragodau puru po is cosas chi ait fattu po difendi sa cultura e sa ’imba sadra crabarissa: sa vertentza contru a is Sovrintendentzas Archeologicas po sa gestioni de is benis culturalis; su permissu giau a issu attottu de su tribunali de Aristanis de chistionai in Sadru in unu processu innui fiat in mesu; custu situ internet bilingue de su Comuni de Crabas, chi ait bintu in su duamilla e cincu su Premiu de is Regionis in su cuncursu natzionali PWI.; e, cosa fra is prus importantis, su ai sceberàu su Sadru commenti de ’imba ufficiali candu cumparit in una televisioni natzionali.