Museu Civicu de Crabas
Su Museu, inaugurau su 28 de Nadai 1997, s'agatat acanta de su Staniu de Crabas, in sa bessida de sa bidda. A intru ddui funtis arragotas cosas archeologicas agatadas su in prus me in Cuccuru Is Arrius, me in is annus 1978-1980, e me in Tharros, a comintzai de su '50 fintzas a oi. Cuccuru is Arrius permitit de bii in prus patis comenti biviant is antigus, de su Neoliticu mediu fintzas a s'edadi romana.
Ddui funtis espostas cosas agatadas in sa necropoli ipogeica de cultura Bonu Ighinu (Neoliticu Mediu), comenti dolettus feminilis de tipu volumetricu, ceramicas, cantus de prendas, puntas de zagalia de ossu e cantigheddus de preda geometricus de ossidiana. A intru de custa setzioni ant giau logu meda a is ceramicas e a is istrumentus de preda agataus me in is biddas antigas de Santu Ciriacu (Neoliticu Mediu / Superiori), Santu Michei de Ozieri (Neoliticu Superiori) e sub-Ozieri (Eneoliticu). Funtis tipicus de custu logu is dolettus feminilis e unu maschili de terra e marmu. De s'area de su tèmpiu a potzu nuragicu, chi est stetiu torrau a usai in s'edadi romanu-republicana comenti logu de cultu de massaria, benint is istatueddas feminilis de terra. Sa documentatzioni de s'insediamentu est cumpletada de corredus de sa necropoli romana-imperiali (I-III sec. a pustis de Cristu).
Sa pati riservada a Tharros giait unu quadru de sa crica archeologica fata in custus logus de su seculu passau fintzas a oi. Pati de s'espositzioni est dedicada a unu santuariu feniciu-punicu, su tophet, cun documentus fotograficus e figuras chi percurrint sa storia de su scavu. Is urnas de terra, de custas meda funtis pintadas e decoradas, e is crabaturas, faint cumprendi beni su tipu de ceramica de su santuariu tharrensi.
Is stelis de arenaria, postas in una sabighedda de mesania de su museu, funtis testimongius importantis de custa categoria artigianali, tra is prus caratteristicus e cannotus de Tharros. Atrus testimongius prus pitius ddus agataus a intru de is urnas in paris a su chinisu de is pipius e de is animais abarrau a intru, comenti contramazinas e atras cosas de ornamentu.
Unu atru aposentu a intru de su museu ddu ant dedicau a is utimus scavus fatus in su quartieri artigianali de Tharros. Funtis stetius agataus cantus de ceramica, arrogus de terra e de vasigheddus fatus de una pasta tipu imbridiu; interessantis meda funtis is arrestus de ferru e is arrogheddus de is murus de is forrus, chi faint cumprendi cantu fiat importanti s'atividadi metallurgica chi chi ddui fiat in s'edadi punica in custu logu. Una pariga de lastras faint bii su risultau de is utimas cricas.
Tharros romana e paleo-cristiana, esposta in dus pannellus, est rapresentada su in prus de cantus de ceramica e de preda; in mesu a custas ddui funtis concas e arrogus architetonicus de marmu, agataus cun is iscavus de su '50. De signalai unu miliariu de arenaria agatau de pagu tempus me in is campagnas de Crabas.
Una pati de su museu est dedicada a is ispecias botanicas prus tipicas de su Sinis; innoi ddui funtis documentus meda e fotografias.
A s'intrada de su musèu, ddui funtis espostas is mostras temporaneas dedicadas sempri a s'archeologia e a sa storia de su logu nostu.
S'agatat in :
Via Tharros 121, 09072 tel. 0783 290636
Orarius:
- h 9-13 16-20 (istadiai).
- h 9-13 15-19 (ierru).
Su museu est gestiu de sa Cooperativa Penisola del Sinis.