Logus de intaressu
Su Staniu de Crabas
Mannu 2.200 etarus, su Staniu de Crabas at sempri giau de papai e de bivi a is citadinus de Crabas, gratzias a su pisci'e scata, a s'anguidda e a totu is atrus piscis chi ddui bivint. Me in is lacanas de su staniu agataus is pischeras, su sistema impreau de is piscadoris po piscai su pisci. A sou su staniu fait su 20% de totu sa zona. Is milionis de metrus cubus de aqua druchi de su Staniu si mesturant cun cussa de su mari gratzias a su canai scolmadori, cussu chi si biit de sa strada andendi a Santu'anni de Sinis, acanta de sa pischera de Pontis. Su staniu de Crabas est stetiu nominau Situ de Importantza Comunitaria (SIC), segundu de commenti narat sa Direttiva Habitat.
Mistras
Su staniu de Mistras, mannu 600 ettarus, est una paui collegada diretamenti cun su mari. No est profundu meda e s'aqua tropu saia non pemittit a unu certu tipu de pisci de ddui bivi. Testimongiu principali de s'aqua saia est sa vegetatzioni aquatica, poita chi castiaus a intru de sa paui agataus pagu specias de matas e totu "alofile", chi cherit nai amantis de su sai. Su staniu de Mistras est issu puru unu Situ de Importantza Comunitaria (SIC) segundu de commenti narat sa Direttiva Habitat.
De Mari Ermi a Portu Suedda
De Mari Ermi a Portu Suedda sa costa cambiat totu a una bota: s'anea passat a s'arroca fintzas a candu no agataus "Su Tingiosu", innui non ddu est prus nimancu spiaggia ma s'arroca chi cabat dareta a mari. Su primu tretu tenit s'anea de quartzu tipica de su Sinis de Crabas, chi est stetia potada de su mari de s'Isua de Maluentu, chi s'agatat a fachi. Pagu metrus atesu de sa spiaggia andendi a mari, s'anea candia de su fundu maniu fait logu a s'arroca. Est totu unu mesturu de caoris chi passant acanta de su bridi e chi torrant a su drochinu candu a fundu ddu est sa Poseidonia Oceanica, chi bivit innui s'agatat s'anea. Torrendi a terra, a pabas de is dunas, chi faint unu tretu a longu a longu de Mari Ermi fintzas a Portu Suedda, innui s'anea est prus fini, is pauis de "Mari Ermi" ponint is lacanas a su litorali; issas funtis fra is logus prus importantis de totu sa costa.
Cabu Santu Mracu
Is formatzionis de preda cun una altesa chi arribat fintzas a 52 mt. a sus de su mari e unu e unu sviluppu lineari de giai 1000 mt., funtis testimongius de is edadis geologicas chi ant generau unu quadru ambientali innui s'atzioni de is agentis morfogeneticus, specialmenti de su mari, est stetia, e at a essi sempri adiaici, s'artesanu de unu paesagiu litoraneu tipicu de su Mediterraneu. Is falesias de Cabu Santu Mracu funtis formadas de arrocas meda botas amuntadas a pillu de terrenu mesturau cun arrestus pitius de marmu e crachina e cun blocus de basaltu. In prus de unu tretu ddui funtis interrumpimentus me in is cabadas poita funtis abarraus cantus de una crabatura basaltica prus manna, in cuncunu tretu amuntada de unu mantu de anea de bentu chi de su mari sighint fintzas a intru de terra.
Su Tingiosu
Ata giai 25 mt a sus de su mari e longa giai 2000 mt., sa falesia me in is lacanas de s'Area Marina Protetta, collegat su Sinis de Crabas a cuddu de Sant'Eru de Mibis. S'arroca calcarea bianca de "Su Tingiosu", chi cabat daretu a mari, est unu logu naturali de innui castiai s'Isua de Maluentu chi s'agatat a innantis; si funtis depositadas giai 10/20 milionis de annus fait e de insaras s'atzioni de is agentis chimicu-fisicus de su movimentu maniu ddas at triballadas lassendi signalis a pillu innui su terrenu est prus moddi. Is nicius e is cheas chi percurrint is tretus longus de innui funtis is iscoglius funtis s'arriparu naturali po specias vegetalis e animais adatus a sa vida me in is scoglius, cussu chi permittit a sa falesia de essi unu habitat tra is prus importantis: una lacana tra su mari e sa terra. Tipica est sa presentza de venas de aqua druchi de cuntattu chi bessint a pillu de is arrocas a cuncunu metru a sus de su livellu de su mari, chi si ghetant a intru de issu, lassendi muru muru su segnali de su percursu chi faint.
Santu'Anni de Sinis
In su litorali contenniu tra Santu'Anni, Tharros, Cabu Santu Mracu e Mari Motu, podeus arreconnosci is segnalis de sa storia naturali e de s'omini: de seguru una de is zonas prus rapresentativas de s'Area Marina Protetta innui non est difficili cumprendi ca su mari est stetiu su protagonista principali. In su fundu de su Mari de Sardigna, chi s'agata a innantis, meda botas moviu de bentu foti de Maestrali de nord-ovest, su paesagiu sottomaniu mesturat is caoris crarus de sa presentza de anea quartzosa in paris cun cussa biogenica, cun is caoris scurus de is arrocas arricas de conchiglias antigas de centinaius de milionis de annus fait. Is zonas de anea, cuddas craras, mancai siant prenas de pisci, funtis meda botas impoberidas de su mari chi scudit a suta de sa costa e de is currentis responsabilis de is differentzas stagionalis puru in sa distributzioni naturali de s'anea chi format is spiagias. In su fundu de anea is animais e is vegetalis ddui bivint po pagu tempus, a su contrariu de is zonas innui ddu est s'arroca innui is popolatzionis (prus de totu s'alga) ddui abarrant de prus e funtis prus adatus a sa vida de is animais.
Funtana Meiga
Unu tretu de costa caratterizau a sud de unu campu de bancus de anea mannu e largu innui specias vegetalis adatas a s'anea crescint giai fintzas a mari. Innoi s'anea nascit, prus de totu, de scroxius e cantus de conchiglias. in cuncunu tretu sa spiagia si frimat poita bessint a pillu arrocas de arenaria stratificata (anea cristallizada) chi pigant su logu de s'anea puru in su fundu maniu a innantis. Prus a nord si point bii is diversas edadis geologicas: funtis is calcaris laminaus de su Sinis, is arenarias eolicas incrociadas e stratificadas e is paleosuoli chi s'arriconnoscint po su caori arrubieddu chi bessint a pillu innoi e inguddenis. Su mari a fachi de Funtana Meiga (chi est mentuau poita narant chi sanat), cun sa fortza chi tenit scudit a sus de unu tretu mannu de costa caraterizau de unu fundu basciu chi acanta de sa riba, generat unu movimentu de undas stimau meda, in dogna tempus de s'annu, de is surfistas chi faint acrobatzias sfidendi sa fortza de su mari e de su bentu chi suat de ponenti.