T'agatas in: Domu > Bivi in Crabas > Cresias > Cresia de Santu Srabadoi

 

Cresia de Santu Srabadoi

Sa cresia de Santu Srabadoi est stetia costruia a sa fini de su XVIII seculu. Importanti deaderus po su valori storicu-culturali est s'ipogeu innui si poit intrai passendi a sus de una scaba de preda a intru de sa cresia atotu, po imbati in una sabighedda cun postas a is latus duas cambaras retangolaris crobetas de bovidas "a botte". Sighendi a caminai in sa saba s'intrat in una rotonda crobeta de una cupola cun potzu de aeratzioni centrali. In terra ddui est unu potzu cun acuas chi funtis cretias potzant sanai, e chi funtis su tretu fondamentali de su cultu antigu. De sa rotonda s'intrat me in atrus tres aposentus, unu semicircolari (in su puntu innui ddui est unu altari) e duus lateralis retangolaris; sempri in terra in mesu in mesu est abetu unu potzu circolari cun unu betilu nuragicu. Me in is murus de giai totus is aposentus, imaginis meda, signus de scritura, scenas de sogetu diversas (navis, duus lionis, diversas figuras de femias) faint cumprendi is diversas culturas chi si funtis sighias.

De seguru de origini pagana, s'ipogeu est stetiu impreau fortzis comenti de catacombe, galera e comenti de logu po si cuai me in is primus tempus de su Cristianesimu. Est fortzis in su IV sec. chi est stetiu cuncodrau po su cultu cristianu e est probabili chi su potzu de su nucleu centrali fessit impreau comenti de logu po is batiais.

Me in bidda, dogna annu, sa prima Dominiga de Cabudanni, torrat sa traditzionali processioni cannota cun su nomini "Corsa degli scalzi" (Cursa de is Iscrutzus).