Vicesindigu
Ambienti, Turismu, Personali, Bilanciu e Programmatzioni
Alessandro Murana
Alessandro Murana est nasciu in Aristanis su 20/06/1968, e est coiau cun Stefania Careddu. At pigau sa Laurea in Economia, in s'Universidadi de is Studius de Casteddu in su 1997, e de su 2000 est dipendente de su S.I.L. “Società Consortile Patto Territoriale di Oristano” chi aministrat is fundus de su CIPE, po su progetu europeu “Patto Territoriale per l’Occupazione“. Murana tenit giai fata una carriera politica e istitutzionali importanti. Giai Contzilleri Comunali in su 1998, de su 1999 otenit s'incarrigu de Assessori a sa Programatzioni, Bilanciu, Patrimoniu e Ambienti. Est s'initziu de una collaboratzioni longa cun su compangiu de partidu (Psd'Az) Efisio Trincas, chi in su 2003 ddi giait sa nomina de Vicesindigu de Crabas: a custu incarrigu s'aciunghint puru is Assessoraus a s’Ambienti, Turismu, Bilanciu e Atividadis Produtivas. De friaxiu 2007 ddi est stetia giada una atra delega de Assessori a su Personali. Alessandro Murana est rapresentanti de s’Enti Gestori in sa Cumassioni de Riserva de s'AMP “Penisola del Sinis – Isola di Mal di Ventre”, cun nomina de su Ministru de s’Ambienti Edo Ronchi, confrimada de su Ministru Altero Matteoli. Est cumponenti de candu est nasciu in su 2005 de su Comitau Esecutivu de su STL “Sardegna Centro Occidentale – Eleonora d'Arborea”. In trebuas de su 2006 est stetiu elegiu in Catania in su Contzillu Direttivu de sa “Federazione Nazionale dei Parchi e delle Aree Protette”. Sa carriera politica de Murana sighit a andai a innantis cun sa candidatura a is Eletzionis Provincialis de su 2005, chi ddi giaint sa possibilidadi de intrai in su Contzillu de Contzilleri prus votau in sa Provincia, e est capugruppo de su Psd'Az. Alessandro Murana est Vicepresidenti de sa Cumassioni Bilanciu e cumponenti de sa Cumassioni Ambienti de su Contzillu Provinciali. De su 2006 est puru Contzilleri Natzionali de su Psd’Az. Tra is meda initziativas pigadas de Murana in su Comuni, cun s'incarrigu de Vicesindigu e Assessori Comunali, depint essi suntas is prus importantis: sa partentza in su 2002 de s'arritiru differenziau de s'aeghingiu cun su metudu “de domu in domu”, primu Comuni in Sardigna a arrispetai su D.Lgs 22/97; sigomenti pigat is patis de su principiu “pagai totus po pagai de mancu”, cun una politica de severidadi aministrativa at abasciau is tributus localis in su 2000, cuntenendi in su tempus sa pressioni fiscali mancai s'inflatzioni fessit antziendi; at accelerau s’insediamentu de is atividadis produtivas in sa Zona Artigianali de Crabas; at favoriu sa nascita de unu progetu de valorizatzioni turistica integrada de su Sinis nominau “Sistema Ospitale Cabras”, su controllu de su traficu de is turistas me in is costas de su Sinis me in istadiai, sa protetzioni fisica de is ispiagias de quartzu e sa gherra a chi furat s'anea; at contribuiu a s’Intesa Istitutzionali tra su Comuni de Crabas e sa Regioni de Sardigna; at cuncodrau cun su logu e is Istitutzionis, po agatai is contenutus de su decretu de agiornamentu de s'AMP in su 2003, chi s'at a depi torrai a agiornai in su 2007. In paris cun s'Assessori a sa Pisca at favoriu sa costitutzioni de sa Sociedadi de Gestioni de su Staniu Sinis-Santu Bissenti e de su Mercau iticu e promoviu sa nascita de s’Ittiturismu de sa Pischera Pontis.
